Leo Mākaʻikaʻi
He haʻawina hoʻolohe kēia nāna e alakaʻi i ka haumāna i loko o ka Hale Aliʻi me ka wehewehena i ka moʻolelo o kēlā me kēia lumi o ka papahele o lalo me ka papahele o luna. He hoʻokahi hola ka lōʻihi o ka mea holoʻokoʻa, hiki naʻe ke māhelehele ʻia i kūpono nā mea e hoʻolohe ʻia no ka haumāna, no ka manawa, no ke kūlana makahiki, a no ke kumuhana paha o ka haʻawina papa.
A King's Noble Vision
Hōʻike ʻia kēia kiʻi ʻoniʻoni pōkole i loko o ka lumi keaka o ka Hale Koa, he 15 minuke ka lōʻihi. Na ke kiʻi ʻoniʻoni e hoʻolauna i ka moʻolelo o ka Hale Aliʻi ʻIolani, a kālele ʻia ka wā noho mōʻī o Kalākaua me Liliʻuokalani me ke kipi hewa i ke aupuni mōʻī i ka makahiki 1893. Hoʻolauna ʻia nō ke kūkulu ʻia ʻana me nā lumi o ka Hale Aliʻi, ka hao ʻia ʻana o kona mau waiwai, me ka hana lokomaikaʻi o nā hanauna e hoʻihoʻi hou i ka Hale Aliʻi i kona kūlana hanohano e ʻike ʻia nei.
Ka Pā Hale Aliʻi
He pāka aupuni ka pā o ka Hale Aliʻi, kahi e kū ai nā kumu lāʻau kahiko, ka lānai poni mōʻī, me kekahi mau wahi pana hou aʻe. Hiki nō i ka papa ke makaʻikaʻi a pāʻina paha ma ka pā hale ma mua o ka hola haʻalele. Ua kokoke nō kekahi mau wahi pana hou aʻe e like me ka Luakini Kawaiahaʻo, Aliʻiōlani Hale, ma ke Kapitala o ka Mokuʻāina.